View this email in your browser
Cylchlythyr Medi 2025
Croeso i'm E-gylchlythyr diweddaraf sy'n cynnwys diweddariadau am yr hyn rydw i wedi bod yn ei wneud yn yr etholaeth ac yng Nghaerdydd.
Dros yr haf, rydw i wedi bod yn ymweld â busnesau a sefydliadau ledled Sir Drefaldwyn. Mae bob amser yn wych mynychu dathliadau o fywyd gwledig dros yr haf, ac mae’n gyfle heb ei ail i mi gwrdd â phobl. Gobeithio eich bod wedi cael haf da.
Os hoffech gwrdd â mi i drafod unrhyw fater neu os gallaf helpu mewn unrhyw ffordd, anfonwch e-bost ataf [email protected] neu ffoniwch fy swyddfa ar 01686 610887.
Tymor y Sioeau
Roedd hi’n dda sgwrsio gyda chynifer ohonoch mewn sioeau a digwyddiadau lleol dros yr Haf, ac roedd hefyd yn gyfle i rannu diweddariadau ar wahanol faterion.
Mae llawer o waith yn mynd i drefnu'r digwyddiadau hyn, ac rwyf am dalu teyrnged arbennig i'r gwirfoddolwyr niferus sy'n rhoi o’u hamser i sicrhau eu llwyddiant.
Ddydd Sadwrn, mynychais sioe olaf y tymor yn Llanfair Caereinion. Gan fod Undeb Amaethwyr Cymru yn dathlu 70 mlwyddiant eu sefydlu ym 1955, roeddwn yn falch o fynychu'r digwyddiad dathlu yn y sioe.
Ffair Gyllido
Rwy'n cynnal Ffair Gyllido ddydd Gwener 24 Hydref 2025, 11am-1pm yng Nghlwb y Monty, y Drenewydd.
Mae'r digwyddiad yn un rhad ac am ddim ac mae croeso i bawb, gan gynnwys elusennau, grwpiau cymunedol, a mudiadau gwirfoddol ledled Sir Drefaldwyn sy'n chwilio am gymorth ariannol. Bydd cynrychiolwyr o gyrff cyllido mawr - gan gynnwys Cronfa Gymunedol y Loteri Genedlaethol, y Gronfa Dreftadaeth, Chwaraeon Cymru, CGGC, Cymdeithas Mudiadau Gwirfoddol Powys a Chyngor Sir Powys wrth law i gynnig cyngor ac arweiniad.
Bydd y digwyddiad yn gyfle i drafod eich prosiectau yn uniongyrchol gyda chyllidwyr, p'un a oes angen cymorth arnoch ar gyfer mentrau newydd, rhaglenni cymunedol, gwelliannau i adeiladau, neu eisiau dal ati i gynnal gwasanaethau presennol.
Rwy'n gobeithio y bydd grwpiau lleol yn galw draw ac yn manteisio i’r eithaf ar y cyfle hwn.
Does dim angen cadw’ch lle, ond os oes angen rhagor o wybodaeth arnoch, cysylltwch â mi drwy e-bostio [email protected] neu ffoniwch fy swyddfa ar 01686 610887
Diweddariad ar y Ffyrdd a’r Rheilffyrdd
Ers cael fy ethol, rydw i wedi bod yn ymgyrchu dros gysylltiadau trafnidiaeth cryfach ar draws Sir Drefaldwyn, gan fod cysylltiadau da yn hanfodol i'n heconomi leol a'n diogelwch.
Rwy'n parhau i bwyso am welliannau diogelwch ar y ffyrdd ar yr A458, yr A44 a'r A483, a chynnydd ar brosiectau allweddol megis ffordd osgoi Pant-Llanymynech ac uwchraddio cyffyrdd yng Nghaersŵs.
Yn ystod y misoedd diwethaf rwyf wedi cynnal cyfarfod gyda Trafnidiaeth Cymru ac rwy’n parhau i rannu pryderon am oedi i drenau newydd ar Lein Arfordir y Cambrian, gan fod teithwyr yn rhy aml o lawer yn wynebu gwasanaethau gorlawn, annibynadwy. Mae croeso i’r gwelliannau hygyrchedd yng ngorsaf y Trallwng, ond mae mwy i'w wneud o hyd.
Mae fy niweddariad llawn yn darparu diweddariadau ar wahanol brosiectau ffyrdd a gwasanaethau rheilffyrdd.
Ein Cynhyrchwyr Bwyd a Diod Lleol
Dros yr haf, rydw i wedi bod yn cyfarfod â chynhyrchwyr lleol i drafod digwyddiad rwy'n ei gynnal ym mis Tachwedd. I ddathlu ein Cynhyrchwyr Bwyd a Diod lleol, rwy'n cynnal digwyddiad 'Diwrnod Sir Drefaldwyn' yn y Senedd lle bydd cynhyrchwyr lleol yn arddangos y gorau o Sir Drefaldwyn.
Fe wnes i daro heibio i Langford's yn y Trallwng, sy'n cyflogi dros 40 o bobl sy'n cynhyrchu cynhyrchion cig arobryn.
Ar ymweliad â fferm Ifor Humphreys, cefais weld ei Wagyu Cymreig yn cael eu dogn dyddiol o Monty's Ale.
Cefais y cyfle i longyfarch Trailhead Fine Foods, y Trallwng, am ennill Gwobr Great Taste a chyrraedd y rhestr fer ym mhrif wobrau diwydiant cig y DU am eu cynhyrchion Cig Eidion Cymreig GI, gan gynnwys eu byrbrydau poblogaidd Get Jerky.
Bum hefyd draw i Coco Pzazz yn Llanidloes, sydd wedi tyfu o brosiect bwrdd cegin i fod yn fusnes siocled ffyniannus y mae ei gynnyrch bellach i'w weld ledled y DU.
Os ydych chi'n gynhyrchydd bwyd neu ddiod lleol a bod gennych ddiddordeb mewn mynychu'r digwyddiad rwy'n ei drefnu yn y Senedd ym mis Tachwedd - a fydd yn arddangos cynhyrchwyr lleol ac yn gweithredu fel digwyddiad rhwydweithio ehangach - cysylltwch â mi.
Gwasanaeth Dydd Mencap Cymru
Mae Mencap Cymru yn gweithio gyda gwasanaeth dydd yn Llanfyllin. Fis diwethaf, mi wnes i alw heibio i sgwrsio â'r rhai sy'n defnyddio'r gwasanaeth.
Atebais lawer o gwestiynau am fy swydd ac am y Senedd. Mae Mencap yn cefnogi pobl ag anableddau dysgu i ennill sgiliau a magu hyder.
Mae popeth y mae Mencap yn ei wneud yn canolbwyntio ar sicrhau bod pobl ag anabledd dysgu yn cael yr un chwarae teg â phawb arall, a’u bod yn cael eu gwerthfawrogi, eu clywed a'u cynnwys yn gyfartal.
Os oes gennych chi anabledd dysgu, neu’ch bod yn ofalwr teuluol neu'n cefnogi person ag anabledd, fe hoffai Mencap glywed eich barn trwy eu harolwg: https://wales.mencap.org.uk/WalesSurvey25.
Hyrwyddir gan Russell George AS, 13 Parkers Lane, Y Drenewydd, SY16 2LT
Mae costau'r cyhoeddiad hwn wedi’u talu gan Gomisiwn y Senedd o arian cyhoeddus.
Ydych chi eisiau newid sut rydych chi'n derbyn yr e-byst hyn?
Gallwch chi update your preferences o'r unsubscribe from this list.