O fis Awst 2025 ymlaen, bydd yn ofynnol i ddeiliaid Bathodyn Glas brynu tocyn talu ac arddangos mewn meysydd parcio cyngor. Mae Aelod o'r Senedd dros Drefaldwyn, Russell George, wedi codi cwestiynau ynghylch a yw Cyngor Sir Powys wedi ystyried yn ddigonol y pryderon y gallai rhai deiliaid Bathodyn Glas, oherwydd eu hanabledd, gael anhawster i ddefnyddio peiriannau tocynnau parcio.
Dywedodd Mr George ei fod wedi cael ei gysylltu gan etholwyr ag anableddau sydd wedi mynegi rhwystredigaeth a gofid ynghylch y newidiadau sydd i ddod i rym fis nesaf, gan y bydd yn ofynnol i ddeiliaid Bathodyn Glas dalu am barcio mewn meysydd parcio a redir gan y Cyngor. Dywedodd trigolion na fyddant bellach yn ymweld â chanol trefi ym Mhowys pan fydd y taliadau’n cael eu cyflwyno. Cymeradwywyd y penderfyniad i ddileu parcio am ddim i yrwyr anabl fel rhan o gyllideb a strategaeth barcio Cyngor Sir Powys yn gynharach eleni.
Fodd bynnag, mae Mr George wedi cwestiynu’r penderfyniad ac wedi gofyn i’r Cyngor gadarnhau a ystyriwyd yn ddigonol y ffaith na allai rhai deiliaid Bathodyn Glas gael mynediad at beiriannau talu oherwydd eu hanabledd.
Mae Mr George hefyd wedi gofyn i’r Cyngor ddarparu dadansoddiad cost a budd—yn benodol cost addasu peiriannau talu i fod yn hygyrch i ddefnyddwyr cadeiriau olwyn o’i gymharu ag incwm disgwyliedig y Cyngor o godi tâl ar ddeiliaid Bathodyn Glas. Mae Mr George hefyd wedi galw am eglurhad gan y Cyngor ar sut mae’n bwriadu cyfathrebu’r newidiadau hyn i ddeiliaid Bathodyn Glas, er mwyn osgoi dryswch ac atal dirwyon annheg pan ddaw’r newidiadau i rym.
Mae’r penderfyniad i godi tâl ar yrwyr ag anableddau yn groes i’r dull a fabwysiadwyd gan nifer o gynghorau eraill ledled Cymru, lle mae deiliaid Bathodyn Glas wedi’u heithrio er mwyn cefnogi mynediad cynhwysol a chyfranogiad economaidd.
Wrth wneud sylw, dywedodd Mr George:
"Rwy’n bryderus iawn am yr effaith uniongyrchol y bydd cyflwyno taliadau parcio ar gyfer pobl ag anableddau a deiliaid Bathodyn Glas yn ei chael.
"Rhaid i’r Cyngor egluro a ydynt yn fodlon bod y rhai sydd ag anableddau ac sy’n defnyddio’r cyfleusterau parcio yn gallu cael mynediad at beiriannau talu i brynu tocyn parcio pan ddaw’r taliadau newydd i rym fis nesaf.
"Mae hefyd yn bwysig deall a yw’r gost o wneud peiriannau tocynnau parcio yn hygyrch wedi cael ei chymharu’n briodol â’r incwm disgwyliedig gan ddeiliaid Bathodyn Glas, y mae llawer ohonynt â dewisiadau trafnidiaeth cyfyngedig.
"Rhaid i’r Cyngor o leiaf sicrhau bod deiliaid Bathodyn Glas wedi’u hysbysu’n glir. Ni ddylai neb gael dirwy am barcio dim ond am eu bod heb wybod am y newid."